Reflexão Dominical
Domingo XXXI tempo Baibain Tinan A
5 de novembro de 2023
I leitura: Mal. 1,14b-2,2b.8-10
Salmo Responsorial: Sl 130 (131), 1-3
II leitura: 1 Tes 2,7b-9.13
Evangelho: Mt 23,1-12
Iha sociedade nebé-nebé de’it, sempre iha líder sira nebé hamriik iha povo ida nia oin, eh la’o hamutuk ho povo ida nudar sasukat no mata-dalan kona ba ukun nian nebé hatúr-an iha princípio lia-lós (verdade no justiça). Líder sira ne’e, povo considera hanesan ema matenek no ne’on-na’in, ema di’ak, coerente no responsável, tanba sira besik liu Maromak no hatene eh cumprende liu LEI sira Maromak nian.
Iha liturgia Domingo XXXI nian, leitura sira foca kona ba contradições nebé líder comunidade Israel nian hatudu. Katak, em vez de, sira fiel ba Aliança nebé Maromak halo ona ho sira nia bei-ala sira hodi hasán ho didiak, ho reponsável no coerente knaar ukun nian hodi haklaken no serbí povo, pelo contrário, sira hatudu fali exemplo aat ba povo Maromak nian hodi husik tiha Maromak nia dalan no hanorin buat nebé lalós ba Maromak nia povo ho sira nia exemplo aat sira. Iha leitura sira Domingo ne’e nian, profeta Malaquias no Jesus rasik critica líder religiosa sira comunidade povo Israel nian tanba exemplo aat nebé sira hatudu.
Iha leitura dahuluk, husi profeta Malaquias nia ibun (post-esílio +/- 480-460 a.C), Na’i Maromak nebé afirma Nia-An nu’udar, buat hotu nia na’in no Liurai kbi’it tomak nia na’in, fo malisan (amaldiçoa) no koalia forte teb-tebes hasoru sacerdote sira povo Israel nian. Iha contexto ne’e, grupo exilados Israelita nian balu fila ona husi fatin exílio nian. Nune’e, sira tama daudaun ba processo harí fila fali Templo. Templo ba povo Israel nudar fatin sagrado, beth Elohim (Maromak nia Uma), pilar importante ida ba história povo Israel nian no concretamente, nu’udar sinal katak “Maromak horik iha povo nia le’et”, nune’e, povo sei hanoin nafatin Aliança nebé Maromak halo ona ho Israel nia Bei-ala sira, povo Israel sai nafatin povo Maromak nian no labele iha tan Maromak seluk, hodi libur-malu, rona no moris tuir MAROMAK NIA UKUN-FUAN (TORAH) iha Templo nia laran. Ba ida ne’e, grupo sacerdotal (tuir tradição sira mak decendentes Aarõo nian, ita bele lée iha Livro Crónicas no Deut 18,1-8), sira mak herdeiro eh liman rohan guardião (hein-na’in) Templo nian no sira mak iha loron shabath hasán knaar atu halo liturgia iha Templo Santo Jerusalém. Grupo sacerdotal ne’e mos além de hasa’e sacrifício ba Maromak em nome do povo, sira iha final da liturgia transmite Maromak nia bênção ba povo Israel.
Buat nebé acontece iha tempo profeta Malaquias nian mak grupo sacerdotal ne’e la hasán sira nia knaar ho didi’ak, no sira: “halo ema barak sidi (tropeça)” (Mal 2,8) ho sira nia hahalok aat no indigno. Ita lée karik livro profeta Malaquias 1,6 – 2,10-16, ita sei descobre razões tanba sá Maromak laran hirus no fó malisan ba grupo eh casta sacerdotal nian: primeiro, tanba sira hasa’e sacrifícios defectuosos (cf. Mal 1,6-14); segundo, sacerdote sira ne’e infiéis ba Maromak nia LEI (cf. Mal 2,1-9); terceiro, sacerdote sira ne’e moris kama-rua iha vida matrimonial nian (cf. Mal 2,10-16). Maske nune’e, Maromak nia liafuan nebe todan, ho intenção atu fanun fali consciência grupo sacerdotal nian ba arrependimento no fila fali hodi hala’o didiak no lolós sira nia knaar eh ministério tuir Nai Maromak nia hakarak hodi hasanto povo de Deus.
Tuir mai, iha leitura daruak, São Paulo iha nia carta dahuluk ba Tessaloicensis sira, fo hanoin fali katak, nia missão mak fó eh sáran nia moris rasik ba comunidade nia di’ak. Nia foca mos dimensão imagem nuudar inan ida nian (imagem materna) iha knaar apóstolo nian (cf. 1Tes 2,7-8): “Ami hakarak iha imi leet, hanesan inan be hamaus oan nebé ko’us”. Nune’e, hahalok di’ak ida nebé suli eh moris husi domin lolós ba comunidade nia di’ak ne’e mak hamoris unidade maun-alin sarani nian. São Paulo rasik afirma katak, nia carta ba comunidade Tesalónica ne’e inspirado husi Espírito Santo nebé iha kbiit atu muda fuan, transforma moris no lori ema ba Maromak: “La’os hanesan ema nia lia-fuan, maibé hanesan Maromak nia Futar Lia-fuan nebé serbisu iha imi fiar-na’in sira” (1 Tes 2,13).
Iha Evangelho, ita rona Jesus hasai lia-fuan forte no todan hasoru ema fariseu no escriba sira. Ema hirak ne’e nu’udar grupo previligiado iha Israelita sira nia leet tanba, sira mak líder religioso importante, mestre eh hanorin na’in tanba hatene didiak TORAH Maromak nia Ukun-fuan no sira simu autoridade atu explica eh interpreta. Dala barak, grupo hirak ne’e sente-an hanesan ema hirak nebé perfeito, puro no lóos liu iha Maromak nia futar-matan. Maibé, pelo contrário, iha evangelho ita rona lia-fuan forte Jesus nian hasoru fariseu no escriba sira. Jesus reconhece privilégio nebé comunidade judaica fó ba sira, maibé critica sira nia exemplo aat nebé tanbá sira laiha COERÊNCIA da vida. Katak, sira hanorin ema seluk kona ba Maromak nia futar lia-fuan, maibé sira rasik la moris tuir. Sira tau naha todan ba ema nia kbáas, maibé sira rasik la hasán no la sente todan ne’e. Tan ne’e, Jesus dehan: “Imi labele husik ema bolu imi mestre, aman, eh doutor wainhira imi laiha qualidade de Coerência da vida (cf. Mt 23, 8-10). Sasukat mestre, aman eh doutor lolós mak coerência da vida no exerçe nia vocação eh knaar sira ho haraik-an: “Imi nebé mak boot liu, sei sai atan. Ema nebé foti na, sei hatún nia; ema nebé haraik-an, sei hahí nia!” (Mt 23,11-12).
Ho inspiração Maromak nia futar lia-fuan nian, ita aprende oinsa importância husi knaar líder religiosa nian. Ministério hotu eh vocação ba vida religiosa nian nudar chamamento hodi saran ita nia moris ba ema seluk nia di’ak (cf. 1 Tes 2,7b-9.13). Tuir mai, ita aprende mos katak, knaar religiosa nia qualidade hatúr iha coerência da vida. No ikus liu, iha knaar reliogiosa nebé de’it mak ita simu, tengki hasán eh lori iha espírito haraik-an eh humildade nia laran.