Reflexão Dominical – Domingo IV tempo Advento – Tinan B

Reflexão Dominical

Domingo IV tempo Advento Tinan B

 24 dezembro 2023

I Leitura           : 2 Sam 7,1-5.8-12.14.16

Sal. Resp.        : Sal 88

II Leitura          : Rm 16,25-27

Evangelho       : Lc 1,26-38

Ita termina ita nia caminhada litúrgica advento nian ho domingo dahát, domingo fiar nian. Domingo ida nebé afirma Maromak nia determinação atu horik iha ita leet, emmanuel. Tama kle’an liu tan, liturgia domingo dahát advento nian reflete kona ba Maromak ida nebe nudar na’in ba história povo Israel nian no história tomak humanidade nian, lakohi halo Nia povo sente la’o mesak, eh sente katak Maromak husik hela eh abandona Nia. Maromak nebé promete ne’e, fiel (cf. Heb 10,23) no hakarak de’it ita ema nia salvação, salvação nebé nakloke ba ema hotu-hotu (cf. Rom 16,26). Maibé precisa ita ema nia colaboração ho Maromak Nia obra salvífica. Maromak oferece nia salvação gratuitamente ba humanidade, maibé husi parte ita ema nian, tem que hatán sim ba Maromak Nia vontade. Iha domingo ikus ne’e ita reflete personagem eh figura boot rua nebé sai nudar exemplo, ema hirak nebe colabora ho Maromak nia vontade: primeiro, liurai boot David, iha história Antigo Testamento nian no, segundo Na’in Feto Virgem Maria, Eva foun humanidade nian, nebé iha nia knotak sai nudar Arca Aliança foun nebé Maksoin, Maromak Nia Oan Mane horik ba.

Leitura dahuluk apresenta promessa Maromak nian ba liurai Davíd. Maromak fo sai husi profeta Natã nia ibun katak, Nia sei la abandona Nia povo iha história tomak hodi la’o nafatin ho Nia povo no, pomessa ne’e sei realiza iha descendência ida David nian, nebe povo sei moris iha reino foun ida, reino dame, domin, segurança no estabilidade, hetan buat diak wa’in no ksolok lolós ba nafatin.

Iha história Israel nian, haktuir katak, por volta de ano 1012 a.C., liurai David sai liurai ida mesak (único) nebe halo território tomak Israel nian sai ida de’it: monarquia unida: reino de norte: Israel no reino de Sul: Judá. Reino rua ne’e nia capital mak Jerusalém. Iha duni capital ne’e mak hatúr Arca da Aliança eh Maromak Nia Uma. Iha Jerusalém mak, liurai David hakarak harí Maromak nia Uma, nudar sinal agradecimento no ninia grandeza. Maibé profeta Natã, inspirado husi Maromak rasik nebé koalia ba nia hateten katak, la’os David mak autor lolós ba grandeza sira hotu história povo Israel nian, maibé Maromak rasik mak protagonista no autor lolós ba buat di’ak no kmanek hotu. No Maromak nia diak, Nia kmanek no prodígios la para de’it ho liurai Davíd nia ukun, maibé, sei tutan no metin nafatin husi derasán ba derasán. Iha contexto ida ne’e, Maromak hatudu Nia An nudar “um Deus nómada (la’o rai, muda husi fatin ida ba fatin seluk tui-tuir Nia povo) – Iha nebé povo horik ba, Maromak iha nebá!”. Maromak la hela iha iha fatin fixo, limitado, fechado, maibé la’o rai ho Nia povo. Nune’e, la’os liurai David mak fo estabilidade ba Maromak, maibé Maromak mak fo estabilidade ba David no nia povo.

Liafuan Uma (iha hebraico bayît) iha significado rua: ida uma hodi hela ba (Templo), ida seluk mak, família, dinastia. Ne’e katak, la’os David mak sei halo uma – templo ba Maromak, maibé Maromak mak sei harí “família – dinastia – ukun – reino” ba David (cf. Sam 7,11). Ida nee mak Aliança davídica, família liurai David nian nebé husi nia tubun no sanak, moris mai Maksoin, Jesus Cristo. Maromak rasik mak sei sai Liurai boot lolós no ideal no Aman ba Israel no Israel foun: “Ha’u sei sai ba nia nudar Aman no nia sei sai nudar oan mai Ha’u (2Sam 7,14a)”.

Iha leitura daruak, ita rona husi parte eh versículos final Carta São Paulo nian ba ema Roma sira. Nebé apresenta ho forma doxologia (glória-hahí) final ida nebe solene nebé acentua universalidade da Salvação iha Jesus Cristo. São Paulo termina nia liafuan ba ema romano sira hodi hasa’e hahí ba Maromak tanba Maromak hatudu sai Ninia mystêrion ba mundo no humanidade tomak. Mistério nebé subar hela iha tempo naruk, maibé oras ne’e hatudu sai plenamente iha Jesus Cristo nia An tomak (iha Jesus nia Liafuan, hahalok, no liu-liu iha Nia mate no moris hias). Mistério nee, tuir mai, ho kbiit Espírito Santo nian, Apóstolo sira hatutan ba povo hotu-hotu, liu-liu ba ema gentiu sira – hodi halo sira hola parte mos nudar liman rohan (herdeiros) povo da Aliança nian no sai membro sira husi Isin Lolon ida de’it, Cristo Nia Isin Lolon rasik (cf. 1Cor 2,1.7; Ef 1,9;3,3-10;6,19; Col 1,26-27; 2,2-4,3). Iha Jesus Cristo mak ema hotu sai família ida de’it. Fiar ida ne’e mak São Paulo haklaken nudar ninia doutrina principal no convida ema hotu atu hakbesik-an hodi simu no fiar ba. Expressão “Amen” final iha ne’e nudar, sinal acolhimento ba mistério boot ida ne’e.

Iha Evangelho, foti husi narrativa kona ba infância Jesus nian, koalia kona ba momento decisivo acolhimento mistério incarnação eh Maromak Nia Oan Mane hola isin nudar ita ema hodi tama no moris hamutuk ho ita iha mundo no restaura fali ita nia identidade no dignidade nudar “ilas no tanesan Maromak nain (Gen 1,26-27)”. Mistério kle’an no aas liu fiar nian ne’e, bele realiza tanba Na’in feto Virgem Maria nia prontidão no fiar incondicional hodi hatán “SIM” ba Maromak nia convite no colabora ho Maromak nia projecto salvífica. História murak ne’e acontece iha aldeia ki’ik ida rai Galileia nian, naran Nazaré (cf. Jo 1,43-46). Galileia, fatin ida nebe ninia cultura heterodoxa, tanba dook husi capital Jerusalém, Judá (parte Sul, centro judaísmo nian: culturalmente no religiosamente), hetan influência barak ho costumes no tradições paganismo nian. Ba feto simples ida Nazaré nian. Portanto, iha no husi fatin nebé la famoso no ema contamino ho cultura pagã ne’e mak, Maromak hakarak hahú nia projecto salvífico hodi salva no restaura humanidade. Ita haré katak, promessa ba história salvação nian la muda: “Nia nebé promete ne’e, fiel (cf. Heb 10,23). Salvação sei mai husi reino (família) David nian (cf. Lc 1,27). Episódio vocação Maria nian ne’e riku tebes iha nia aspecto teológico. Primeiro, ita nota katak, Maromak hadomi nia povo nudar Aman, no la abandona nia povo. No domin Aman nian ne’e, restaura fali nia Aliança husi reino de Norte (tribos de Israel) nebé dook no haluhan tiha Aliança nebé sira nia bei-ala sira halo ona ho Maromak. Segundo, obra salvação nian acontece liu husi disponibilidade no colaboração ita ema nian. No figura especial nebe sai nudar modelo fiar no primeira colaboradora obra salvação nian mak Na’in feto Virgem Maria. Nune’e, hodi besik atu tama daudaun ba mistério boot Natal, ita bele reflete katak, história no hahalok Inan Maria nian hatudu no fo esperança katak, ita hotu, liu husi ita nia “sim” no “entrega total”, ita bele sai dala ida tan, instrumento eficaz (kmanek no útil) ba qualquer obra salvação ba mundo no humanidade.

Oras ne’e, mai ita ida-idak hakmatek oitoan hodi husu: “Buat saída mak Maromak husu husi há’u atu bele sai nudar Nia colaborador/a eh instrumento ba Nia obra salvífica?