Reflexão Dominical
Domingo III tempo Advento Tinan B
17 de dezembro de 2023
I Leitura : Is 61,1-2a. 10-11
Sal. Resp. : Lc 1,46-48.49-50
II Leitura : 1 Tes 5,16-24
Evangelho : Jo 1,6-8. 19-28
Advento mak tempo ba mudança interior eh transformação fuan-laran nian, atu nune’e, Maromak Nia Oan Mane Jesus Cristo bele hetan fatin hodi moris no lori ksolok, dame, perdão no esperança moris rohan laek nian mai ita ida-idak. Sinal concreto katak ema ida tama iha ambiente eh espiritualidade advento nian mak wainhira nia moris iha proposta sira nebe domingo advento ida-idak propõe. Domingo Advento dahuluk husu atitude vigilância (matan moris neon-na’in), katak brani foti matan fuan nian hateke ba kmanek lalehan nian, hodi dada iis esperança moris rohan-laek nian, em vez de, preocupa demais ho buat sira mundo eh rai nian. Iha domingo advento daruak, liturgia bolu ita nia atenção atu hadi’a dalan ba Na’i be atu mai. Lia menon profético ida nebe forte teb-tebes, nebe promete moris foun ba ema hirak nebe hakarak simu Na’i Maksoin. Iha domingo datoluk ne’e, nebe hanaran mos domingo “gaudete – alegria”, liturgia husu ita atu hakiak hahalok espírito “ksolok lolos nian – alegria do coração”, hanesan Na’in Feto Maria rasik nebe iha mistério anunciação Anjo Gabriel nian, katak nia atu sai Maromak nia Inan hodi ko’us Na’i Jesus Cristo, nia hananu knananuk Magnificat: “Há’u nia klamar hahi Na’i, hau neon haksolok iha Maromak, háu Maksoyn” (Lc 1,46-47), nebé ita hananu iha Salmo responsorial.
Iha Leitura daruak, São Paulo, convida ita atu hein hodi simu Na’i nia hi’it-An mai ho hahalok tolu: ksolok nebe la lakon (alegria constante), hamulak bei-beik (oração perseverante) no fo agradece ba Maromak iha no tan buat hotu (ação de graças contínuo). Hahalok tolu ne’e, nudar hahalok fiar na’in ida nian nebe tau fiar no laran metin iha Maromak no halo Maromak nudar nia helik eh sadere fatin. Haksolok nafatin (alegria constante, 1Tes 5,16), nudar atitude ida nebe indica katak, ema ida fiar la rua-rua iha Maromak, la duvida Maromak nia domin no tau-matan ba nia. Katak, iha moris, biar experiência sira moris nian bele kahur ho incerteza, terus, susar, mata-wen, kanek, kiak no mukit, plano sira la la’o tuir ita nia hakarak, maibe, ita la lakon laran metin katak, Maromak la husik ita mesak. Dala ida tan, ita fila fali ba hahalok Nain Feto Maria nian wainhira nia hananu knananuk magnificat, hatudu ksolok lolos no dame nebe moris iha fuan-laran (alegria e paz interior). Ita liga karik ho Evangelho, Jo 1,6-8. 19-28 no leitura dahuluk, Is 61,1-2a. 10-11, ksolok lolós ne’e mak IDA nebé João Batista haklaken namanas iha rai-fuik- maran: “Há’u sarani imi ho wé, maibe, iha imi leet iha IDA nebe imi la hatene, nebé hau la soia tu kore Nia sandalias talin!” (Jo 1,26-27). Nia mak, o Ungido de Deus (ida be Maromak kose mina, simbologia kbiit no knaar liurai no profeta nian). Nia mak Jesus Cristo rasik, Ida nebe Aman Maromak haruka mai, Maromak nia Espírito horik iha Nia, tuir lia-fuan nebe profeta Isaias hateten nanis ona: “atu haklaken lia-foun diak ba ema kiak sira, atu fo isin di’ak ba hirak nebe neon susar, atu haklaken maksoin ba dadur sira, no liberdade ba prisioneiro sira, atu fo sai tinan graça Na’i nian” (Is 61,1-2). Wainhira Jesus iha Sinagoga Nazaré nian iha loron Sábado ida, Lia-fuan ksolok no kmanek ida ne’e duni mak afirma identidade Messiânica no realização eh cumprimento husi Torah, profecia profeta sira nian, no Escritura rasik,:”Na’i nia Espírito iha Há’u, basá Nia foti tiha Há’u atu haklaken liafoun diak ba kiak sira. Nia haruka Há’u atu haklaken maksoin ba dadur sira no halo matan delek sira haré; atu soi sira nebe ema hanehan, hodi haklaken Na’i nia tinan rahun kmanek nian” (Lc 4,18-19). Katak, missão Jesus nian iha mundo mak atu kasu ita ema nia salan sira no hasai ita husi atan eh ukun diabo nian, sala sira pessoal no social nian. Jesus Cristo mesak de’it mak bele fo fali mai ita dignidade lolós nebe ita lakon tiha nudar: “ilas no tanesan Maromak nian” (Gn 1,26-28) no liberdade lolós hanesan Maromak oan doben sira.
Tuir mai, ksolok lolos hodi hein Messias nebe atu mai, hatúr eh caracteriza iha hahalok hamulak bei- beik (oração perseverante, 1 Tes 5,17). Ida ne’e mak hahalok daruak atu metin nafatin iha ksolok lolós. Ksolok lolós ita ema sarani eh fiar na’in nian labele sosa ho osan, labele hetan iha sasán sira mundo nian, maibé liu husi rona hodi halo tuir Maromak nia futar Lia-fuan nebe revela iha Nia Oan Mane Jesus Cristo. Ema nebé hamulak nafatin, sei la lakon confiança no laran metin iha Maromak. Oração tulun ita atu hatene haré acontecimento sira moris nian ho matan fiar nian. Oração hakbiit ita husi laran, atu hasoru todan no babeur sira mundo nian ho hakmatek no brani. Ta’uk mak sinal katak fiar na’in ida lareza. Wainhira ita la reza, ita nia moris abut la metin. Ita nia fuan fácil atu namlele wainhira hasoru babeur: ksolok eh prazer sira mundo nian, osan no posição. Ema ida, to’o bele sacrifica eh halo ema seluk sai vítima, atu nia bele alcança nia interesse pessoal. Oração possibilita ita atu bele iha relação ida nebé metin ho Maromak no halo ita hatene lolós Maromak nia vontade hodi moris tuir. Liafuan capaz ida nebe ita bele cita: “Labele dehan ba Maromak katak o tauk, maibe dehan ba ta’uk katak o iha Maromak”. Loos duni, Jesus iha tentação oi-oin mundo nian nebe Nia escolante sira hasoru, Nia husu atu sira matan moris neon na’in no harohan nafatin: “Matan moris neon na’in no harohan ba atu imiketa monu ba babeur. Espírito forte, maibé isin kbiit laek” (Mt 26,41). Nune’e, quanto mais ita reza, ita sente besik liu ho Maromak no ita moris liu iha hakmatek, serenidade, dame fuan laran nian (paz interior). Diabo nia babeur la fácil atu hamout ita no halo ita sai atan. Ksolok lolós ema fiar na’in ida nian mak wainhira nia iha kbiit atu hadóok-an husi sala no bele moris livre hanesan Maromak oan doben hanesan “ilas no tanesan Maromak nian”. Oração hamosu ksolok lolos, no ksolok lolos halo fiar na’in ida hatene hasa’e nafatin agradece ba Maromak iha nia moris loro-loron.
Hahalok datoluk mak, fo agradece ba Maromak iha no tan buat hotu (ação de graças contínuo, 1 Tes 5,18), katak hatene reconhece moris nee nudar DOM eh graça ida. Capacidade atu manán diabo nia babeur, la’os tanba há’u mak maka’as, maibé tanba Espírito Santo nia kbiit moris iha há’u fuan laran: “…La’os tan há’u mak moris, maibé Cristo mak moris iha há’u. Moris nebé há’u moris ohin, há’u moris husi fiar iha Maromak Nia Oan Mane nebe hadomi há’u no saran Nia moris tanba há’u (Gal 2,20)”.
Ksolok lolos, oração no hatene fo agradece ba Maromak mak, hahalok importante liu, fiar na’in ida- idak, comunidade religiosa eh paróquia ida-idak, Uma-kreda rasik tengki buka, hakiak no haburas iha nia moris. Atu bele cumprende projecto lolós Maromak nian iha ita nia moris, em vez de, ita nia projecto, vontade no plano rasik mak boot liu fali Maromak nian, ita precisa fila fali ba oração constante (hamulak ba nafatin), nebé sai centro husi hahalok boot tolu nebé ita foin reflete.
Ita reza mos ba Amu Papa Francisco nebe halo tinan moris ba dala 87, atu Maromak haraik nafatin isin di’ak no hamahan nia ho Nia graça no kbiit tomak, iha knaar Petrino, ukun Uma-Kreda nian.