Temática kona ba vocação nudar reflexão importante ida iha Sagrada Escritura, hahú kedas husi Testamento Tuan to’o Testamento foun. Vocação katak, Maromak bolu, no ita ema hatán. Buat nebé ita bele observa mak, vocação nudar iniciativa ida, uluk nana’in husi Maromak (1Sam 3,4: “Maromak bolu Samuel … no Samuel seidauk hatene Maromak”). Maromak matan monu ba ita ema, nune’e Nia bolu ema balu (feto eh mane) atu hola parte iha Nia projecto da salvação. Concerteza, iha reação natural oi- oin nebe ita bele nota wainhira mosu vocação ida. Por exemplo vocação Abraão nian (cf. Gn 12,1-4), vocação Moisés nian (cf. Ex 3,1-22), vocação Jonas nian (cf. Jn 1,1-16), vocações profeta sira nian (Jeremias, Isaias, Ezequiel, Elias, Samuel, etc), hatudu katak, dala barak ita ema la pronto atu hatán no simu Maromak nia projecto, no dala barak mos ita ema hakarak halai sés tiha husi Maromak nia vontade, dala barak mos ita ema la consciente no la rona katak Maromak bolu daudaun hela ita. Maske nune’e, Maromak fo tada dalan no sinal sira hodi tulun ema nebe nia bolu ona nee. Maromak mos hakbi’it nia emar nee ho liafuan aten brani nian: “Ba! Há’u sei hamutuk ho o!” (Ex 3,12). Ho nune’e, ema ida, ikus mai hatán ho fiar no confiança atu colabora ho Maromak. Iha parte seluk, hanesan ita rona iha Evangelho Jo 1,35-42, vocação mosu mos husi intermediação (ema seluk nia tulun) no, liu-liu curiosidade ema ida nian atu descobre no hetan buat ruma eh to’o ba buat ruma nebe nia folin boot liu. Katak, ita ema matan monu ba Maromak nebé liu husi ita nia dalan moris nian no, tuir mai, ita laran manas hodi la’o tuir Nia no brani colabora ho Nia iha nia obra salvação nian. Iha catequese São João Evangelista nian, buat nebe folin boot liu mak o encontro com Messias eh hasoru malu ho Maksoin, Jesus Cristo: “…ami rasik rona no hatene katak Nia duni mak mundo nia Maksoin” (Jo 4,42). Wainhira ita reflete kle’an liu tan, ita descobre katak, qualquer chamamento eh vocação convida ema ida atu tama iha mundo Maromak nian (santidade) hodi tuir mai, hola parte activamente iha knaar sá-sá de’it nebe Maromak hakarak confia ba ita atu hala’o hodi harí no habelar nia Reino domin, dame no justiça iha contexto tempo ida nian no sociedade ida nian. Atu bele tama ba mundo foun Maromak nian ne’e, iha oda matan boot rua nebé ita tengki liu: ida, loke fuan no laran hodi bele rona Maromak nia lia bolu; rua, brani la’o tuir Maromak nebé halo An ba Ema iha Jesus Cristo nee nia vontade.
Liturgia Domingo daruak tempo baibain nian convida ita atu reflete kona ba vocação Maromak nian ba ita ema, liu husi experiência vocação profeta Samuel nian no escolante dahuluk Jesus nian: André, escolante anónimo (evangelista la temi naran) no Simão Pedro. Hodi reflete ba experiência vocacional hirak ne’e, ita mos sei hola fali consciência kona ba vocação nebé Na’i Maromak haraik mai ita-ida-idak. katak, Mundo foun ida bele mosu mai, wainhira ita ema hatene rona hodi loke fuan, loke neon no brani hatán ba Maromak nia lia bolu hodi la’o tuir Nia.
Iha leitura dahuluk, ita rona kona ba vocação profeta Samuel nian. Samuel, oan husi Elcana no Ana nebe Biblia haktuir katak la ko’us (estéril). Elcana iha kaben rua, Ana no Penina. Poligamia buat normal iha cultura tempo neba nian. Tanba Ana la ko’us, então Elcana decide hola Penina nebe fo oan feto no mane barak ba nia. Maske nune’e, Elcana nia domin boot liu ba Ana. Tuir mai, tanba Ana iha fiar, perseverança no la lakon laran metin ba Maromak nia laran diak, ikus mai, Maromak haraik oan ida ba nia, no nia hanaran Samuel (katak, Maromak rona). História Samuel nian hatudu katak Maromak nunca abandona ema fiar nain nia harohan. Liu husi Samuel, Maromak haraik fali mata-dalan diak ida ba Israel. História Samuel nian fo tada mos kona ba oinsa história Israel nian, Maromak rasik mak ukun no guia liu husi nia providência no fiar na’in sira nia laran metin ba Maromak. Buat foun, mundo foun, Israel foun nebe sei mosu mai liu husi liurai David nia ukun (cf. 1Sam 16,1-13), acontece tanba fiar na’in sira nia hatán ba Maromak nia lia bolu. Uluk nana’in tanba, Samuel nebé loke fuan no neon hodi rona Maromak nia lia bolu (1 Sam 3,10). Samuel, hanesan ita rona iha leitura dahuluk, moris iha ambiente santuário Silo nian, nebé Arca da Aliança hela ba. Wainhira Samuel moris mai, nia inan Ana oferece no consagra nia ba Maromak, tan ne’e nia maske seidauk hatene lolós Maromak, nia hamutuk ho sacerdote Heli sai nudar servidor santuário nian (cf. 1Sam 1,11.22-28). Iha experiência vocação Samuel nian ne’e, ambiente importante ida nebe descreve Maromak nia bolu mak, wainhira nia toba hela, maibé nia tulun rona, nia fuan rona maibe la cumprende. Iha momento silêncio nian ida, hakmatek kalan nian, nebé dook husi barulho no confusão. Loos duni, iha contexto vocação nian, Maromak nia futar Liafuan, fácil liu atu ita rona no nabotun iha ita nia fuan laran. Dala barak, hanesan mos Samuel, iha lian oin-oin moris loro- loron nian nebe tama iha ita nia ulun no fuan laran, ita bele la consegue identifica Maromak nia futar Lia fuan. Intervenção sacerdote Heli nian hatudu katak, dala barak ita precisa ema ruma nebé neon na’in (sábio e espiritual) atu bele hatudu lolos Maromak nia vontade iha ita nia moris. Ikus mai ita Samuel consegue hatán:”Koalia ba Nai, ita nia atan rona” (1Sam 3,10). “Rona” iha contexto bíblico la’os dei trona buat ruma husi tilun, maibé significa liu-liu “simu ho fuan no obedece ba Maromak nia futar Lia- fuan hodi sai instrumento eh liman-ain Maromak nian”. Ikus liu, iha experiência vocação Samuel nian haktuir katak:”Samuel boot ba daudaun, Maromak hamutuk ho nia no laiha Maromak nia futar Liafuan ida nebe la sai tuir lolós nudar Nia promete” (1Sam 3,19). Ida nee mak sinal sira nebé ita ema bele hatúr hodi identifica vocação nebé lolós duni mai husi Maromak. Wainhira, ema ida nebé simu lia bolu Maromak nian, maibé nia la buras iha Maromak nia graça no nia la sai nudar instrumento realização promessa sira Maromak nian, significa buat balu la’o ladún los, no precisa halo introspecção ba nia moris vocacional eh nia relação ho Maromak.
Iha Evangelho, iha parte introdutória Evangelho São João nian, acentua kona ba vocação escolante João Batista nian nebe sai escolante dahuluk Jesus nian tanba descobre Ida nebe folin boot liu: “Maromak nia Bibi-Oan”. Ita rona, wainhira sira descobre no hasoru malu tiha ho “o Cordeiro de Deus”, sira husik sira nia mestre João Batista hodi la’o tuir Messias. Título “O Cordeiro de Deus”, nebé Evangelista João usa hodi apresenta Jesus, refere ba “Bibi-oan páscoa nian – o Cordeiro Pascal”, síbolo libertação nebe Maromak haraik ba nia povo Israel, hodi sai husi atan Egipto nian (cf. Ex 12,3-14.21- 28). Expressão “Maromak nia Bibi-Oan” nee duni mak define identidade messiânica Jesus nian nebe sai nudar Salvador do mundo. Vocação iha nia sentido nebé essencial liu significa, “Tuir Jesus”, katak, la’o tuir Jesus, hela ho Jesus, halo Jesus nia moris, sai ita nia moris rasik, Jesus nia missão sai ita nia missão rasik, entrega-an tomak ba Jesus, ba nati tuir Jesus iha dalan no hahalok domin (cf. Jo 1,43; 8,12; 10,4; 12,26;13,36; 21,19). Atu bele la’o tuir lolos Jesus, ema ida tengki hatene “Saida mak nia buka?”. Jesus nia dalan, la’os hanesan ita ema nia dalan, Jesus nia hahalok la’os hanesan ita ema nia hahalok, Jesus nia promessa la’os hanesan ita ema nia promessa. Dinámica perguntas no respostas entre Jesus no escolante dahuluk sira: “imi buka saída?” – “Ita horik iha nebe?” – “mai no haré!” sai nudar dinâmica epiritual escolante ida nian iha tempo hotu-hotu. Ponto importante ida tan nebé ita bele observa iha vocação escolante dahuluk sira nian mak sira la’os de’it acolhe Jesus ho fuan no laran nudar Messias, maibé sira sai ema foun: “O mak Simão, João nia oan. O sei hanaran an Cefas, katak Pedro” (Jo 1,42).